Psa 145 | YomNWM | STEP | Nkunga wu nzitusu wu Davidi. Ndiela kuyayisa Ntinu, Nzambi ama. Ndiela zitisa dizina diaku mu zithangu zioso ayi mu mvu ka mvu.

Psalms 145

Kipfumu kiaku kidi mu zithangu zioso

Nkunga wu nzitusu wu Davidi.

1 Ndiela kuyayisa Ntinu, Nzambi ama.
Ndiela zitisa dizina diaku
mu zithangu zioso ayi mu mvu ka mvu.
2 Ndiela kuzitisa mu kadika lumbu
ayi ndiela yayisa dizina diaku
mu zithangu zioso ayi mu mvu ka mvu.
3 Yave widi wunneni ayi niandi lutidi fuana mu zitusu
ayi bunneni buandi bulendi fiongonono ko kuidi mutu.
4 Tsungi yimosi yela niemisa bisalu biaku
kuidi tsungi yinkaka
ayi bela yolukila mavanga maku ma lulendo.
5 Bela tubila kiezila ki nkembo wu nzitusu aku ;
ayi minu ndiela yindulanga bisalu biaku bitsiminanga.
6 Bela yolukila lulendo lu bisalu biaku bi tsisi ;
ayi ndiela yamikisa mavanga maku manneni.
7 Bela sanisina mamboti maku mawombo-wombo
ayi bela yimbidila busonga buaku mu khini.
8 Yave widi nkua nlemvo ayi wumonanga kiadi ;
kavika fuemanga ko ayi fulukidi mu luzolo.
9 Yave widi wumboti kuidi batu boso ;
kiadi kiandi kidi kuidi batu boso kavanga.
10 Bibioso bi wuvanga biela kuzitisa, a Yave ;
banlongo baku bela kuyayisa.
11 Bela yolukila nkembo wu kipfumu kiaku
ayi bela tubila lulendo luaku,
12 mu diambu di batu boso bazaba mavanga maku ma lulendo ;
kiezila ki nkembo ki kipfumu kiaku.
13 Kipfumu kiaku kidi kipfumu mu thangu yi kayimani
ayi luyalu luaku lunzingilanga mu zitsungi zioso.
Yave widi wukuikama mu zitsila ziandi zioso
ayi nkua luzolo kuidi batu boso kavanga.
14 Yave wunsimbanga babo bobo beti bua
ayi weti vumbula bobo badi bakomvama.
15 Meso ma babo makutalanga
ayi ngeyo weti bavana bidia mu thangu yifuana.
16 Ngeyo wunzibulanga koko kuaku
ayi wunyukutisanga zitsatu zi kadika kima kidi moyo.
17 Yave widi wusonga mu zinzila ziandi zioso
ayi widi nkua luzolo kuidi batu boso kavanga.
18 Yave widi wufikama kuidi babo bobo bankutelanga,
kuidi babo bobo bankutelanga mu kiedika.
19 Niandi weti dedikisa zitsatu zi bobo beti ku kinzika ;
weti wa yamikina kuawu ayi weti ku bavukisa.
20 Yave weti sunga babo bobo beti kunzola
vayi wela bunga batu boso bambimbi.
21 Munuꞌama wela yolukila nzitusu wu Yave,
bika kadika vangu kizitisa dizina diandi dinlongo
mu zithangu zioso ayi nate mu mvu ka mvu.